«Әкімшілік жауапкершілік деген не?» тақырыбында түсіндірме жұмыстары

Төле би  атындағы орта мектебінде Шу АПБ-нің ЖІІҚ-нің ювеналдық бөлімшесінің инспекторы,полиция лейтенанты  «Әкімшілік жауапкершілік деген не?» тақырыбында  түсіндірме жұмыстарын жүргізді. 

Мақсаты: білім алушыларға қылмыстың – қоғамға қауіпті әрекет, оның ішінде кәмелеттік жасқа толмағандардың қылмысы, әкімшілік-қылмыстық кодекс баптары бойынша қылмыстық жауапкершілік, оған қолданылатын жаза түрлері, кінәні жеңілдететін, жауапкершілікті ауырлататын жағдайлар туралы түсіндіру, құқықтық сауаттылығын арттыру. 

Түсіндірме жұмысы барысында бала құқығы туралы ҚР заңнамалары,әкімшілік -қылмыстық кодекс баптары бойынша түсіндіру жұмыстары жүргізіліп, мектепте белгіленген ережелерді сақтауға кеңес беріліп,қажетті сын-ескертпелер айтылды.

Әкімшілік-қылмыстық кодекс баптары бойынша 18 жасқа толмағандарға заңды өкілдерінің еріп жүруінсіз түнгі уақытта үйден тыс жерде болуға тыйым салынады.

Нақтырақ айтқанда:

•  Қоғамдық мекемелерінде – 22:00 – 6:00

• Тұрғынжайдан тыс жерде сағат – 23:00 – 6:00

* Тұрғынжай заңды өкілдерінің тұрғылықты жерi болып танылады

(ҚР Азаматтық кодексі 16-бап)

Ойын-сауық мекемелеріне ойын мекемелері, түнгі клубтар, дәмхана-барлар, мейрамханалар, интернет-дәмханалар, компьютер, бильярд, кинотеатрлар, ойын-сауық мақсатындағы нысандар және  спорт, мәдени-демалыс мақсатында қызметтер көрсетілетін өзге де ғимараттар, үй-жайлар, құрылыстар жатады. (ҚР «Әкімшілік құқық бұзушылық туралы» кодексі 422-бап)

«Әкімшілік құқық бұзушылық туралы» кодекске сәйкес, бала заңды өкілімен болуы тиіс, яғни ата-ана, асырап алушы, қорғаншы, қамқоршы, баланы қабылдайтын ата-аналар, патронат тәрбиелеуші немесе олардың орнындағы басқа да адамдар.

Түнгі 22-00 ден кейін тәртіп бұзу дерегі бойынша ұсталған кезде кәмелетке толмаған бала полиция бөлімшесіне жеткізіліп, жеке басы анықталады және ата-анасына хабар беріледі. Бұл ретте, бала ойын-сауық мекемесінде ұсталған болса, ата-анасына бірінші рет ескерту жасалады. Бірақ тәртіп сақшыларының көзіне қайтадан түссе  ата-ананың немесе басқа да заңды өкiлдердiң кәмелетке толмаған балаларды тәрбиелеу және (немесе) оларға білім беру, олардың құқықтарын және (немесе) мүдделерін қорғау жөнiндегi, сондай-ақ оларға күтім жасау және күтіп-бағу жөнiндегi мiндеттердi орындамауы бойынша – он айлық есептiк көрсеткiш мөлшерiнде айыппұл салуға алып келеді.